Fjærland bygdalag

Kontorfellesskapet vårt ved Bremuseet i Fjærland er no i drift. Her finn du to arbeidsstasjonar med tilrettelagde PC-skjermar.
Kontoret er eit tilbod til deg som ynskjer ein stad å jobbe eller studere utanfor heimen eller hytta di. Vi ynskjer også at dette skal vere ein møteplass for frivilligheita i Fjærland.
Liv og Lyst vil nytte kontorplassane til vidare arbeid med prosjektet sitt. Dersom andre frivillige i bygda ynskjer ein stad å gjere kontorarbeid for laget sitt, kan de låne kontorplass gratis.
Dette er ei prøveordning, og vi set pris på innspel og tilbakemeldingar undervegs.

Utstyr og fasilitetar

Arbeidsstasjonane har:

• 40” skjermar med dokking og tilkopling til dei fleste PCar.
• Heilt nye, justerbare kontorstolar.
• Hev/senk-funksjon på ein pult.
• Tastatur og mus (ein kan òg ha med eige).
• Rein pult-regel.
  Du har også tilgang til:
• Konferanseskjerm.
• Internett: tilgang til bremuseet sitt gjestenett.
• Toalett: eige toalett i kontorbygget.
• Kafe: tilgang til kafeen på Bremuseet (obs! museet er stengt om vinteren)

Pris og betaling

100 kr per dag, men gratis når du studerer eller jobbar for eit frivillig lag i Fjærland.
Betaling via vipps til Fjær-land Bygdalag #114473. Merk betalinga med «kontorfellesskap».

Tinging

Reserver plass ved å sende melding til Else Mundal, telefon: 976 49 724.
Betalande gjester har prioritet. Dersom begge plassane er reservert, får du tilbod om ein plass utan skjerm.
Venleg helsing Liv og Lyst i Fjærland

Eg får fyrst understreka at «Arnold-stiftinga» ikkje er noko offisielt namn! Eg bruker det likevel av di det er brukt i daglegtalen. Så til saka: Gåva etter Arnold Mundal er ei av dei største sakene i Fjærland på lang tid, og no har arbeidet med å forvalta gåva starta opp. Me har halde eit fyrste fellesmøte mellom bygdautvalet og stiftinga som skal starta opp. Referatet frå møtet finn du på sida for sakspapir.

Bygdalaget har lenge hatt eit vips-nummer for dei som vil betala båtleige i småbåthamna. Den siste tida har dette nummeret vore inaktivt, så folk ikkje kunne betala. Grunnen var at avtalen med Vips* var utgått, og me måtte aktivera han på nytt. Dette hadde ikkje ny leiar i bygdautvalet fått med seg, men no er det ordna! Sjekk gjerne info om hamna her, her eller på turistsida vår her. Prisane er utdaterte, men resten av informasjonen skal stemma ganske bra.

(*Leiaren veit at DnB skriv «Vips» med to p-ar, men han synest dette er tåpeleg og nektar å gå med på det sjølv om det er eit eigennamn.)

Sumaren har vore varm og tørr, og ikkje alle blomane på torget i Mundal har greidd seg. Fjærland guiding har gjort oss merksame på dette, og vil friska opp litt. Bygdautvalet takkar!

Det er ikkje uvanleg at bosskorger og -kontainerar blir overfylte i turistsesongen. Slik er det over heile landet, og slik er det diverre somtid i Fjærland òg. Styret i bygdalaget har kontakta både kommunen og renovasjonsselskapet (Simas) i fleire omgangar for å få tømt bosset. Bosset på ferjekaia er no tømt, og Simas svarar slik om tømmefrekvensen:

Restavfall tømmes kvar veke i høgsesong (veke 22- 36). Papp/papir kvar 4 veke, og vert satt opp ekstratur ved behov. Våtorganisk er kvar 2. veke heile året, men er kvar veke i høgsesong. Glas/metall er normalt kvar 12. veke, men vert også her satt opp ekstratur ved behov

Dette er sjølvsagt ein del av ei større sak, der me i bygdautvalet (styret i bygdalaget) ynskjer å få flytt hytterenovasjonen til ein annan stad i Fjærland, slik at ikkje hyttekontainarane blir overfylte når turistane kjem. Dette strandar kort fortalt på kommunal økonomi, fordi det kostar å få ny tomt til bruk for renovasjon (dette er kortversjonen, det finst meir informasjon for dei som er ekstra interesserte). Me tek gjerne imot framlegg til løysingar, og du kan kontakta oss om saka.

På denne nettsida vil du finna informasjon både om Fjærland bygdalag i seg sjølv, slik som vedtektene våre, kven som sit i styret og korleis du kontaktar oss, i tillegg til informasjon om saker me jobbar med. Me skriv òg litt nytt av og til. Me vonar sida kan hjelpa til å vita kva som skjer!

No i løpet av sumaren har bygdalaget jobba litt i småbåthamna. Me har laga eit trådlausnett som er gratis for dei som betaler den ganske rimelege kaileiga i gjestehamna. Når du har betalt kaileiga, kan du gå på butikken og få ein lapp med kode til trådlausnettet. Sendaren står på sørvisbygget, og dekkjer trekaia, flytebrygga og området rundt.

Me vonar denne ekstratenesta vil gjera det endå betre å vera båtgjest i Fjærland.

Nettverket er bygd på dugnad, og utstyret er kjøpt inn av bygdautvalet.